मैत्रिणींचा जमला मेळा :
हास्य फुलले अन् डोळ्यांच्या कडाही पाणावल्या…
सेलूतील नूतन कन्या प्रशालेच्या माजी विद्यार्थिनींच्या मेळाव्याला उत्साहात सुरुवात
आज उद्घाटन, विविध कार्यक्रम : रविवारी २९ डिसेंबर रोजी सकाळी सात वाजता प्रभातफेरी काढण्यात येणार आहे. नऊ वाजता सार्वजनिक आरोग्य व कुटुंब कल्याण राज्यमंत्री मेघना साकोरे-बोर्डीकर व प्रा.डॉ.इच्छा शिंदे यांच्या प्रमुख उपस्थितीत उद्घाटन आहे. ‘आम्ही कशा घडलो’ या विषयावर आजी विद्यार्थिनींशी सुसंवाद व मार्गदर्शन, तर ‘माझी शाळेविषयी कल्पना (सुधारणा, योजना) या विषयावर विद्यार्थिनी विचार मांडणार आहे. दुपारी दोन वाजता मुक्तचिंतन, मनोगत व समारोप आहे.
सेलू/परभणी : सेलू येथील श्रीमती लक्ष्मीबाई लालजी रामजी नूतन कन्या प्रशालेच्या सुवर्ण महोत्सवी वर्षानिमित्त आयोजित माजी विद्यार्थीनी मेळाव्याला शनिवारी (२८ डिसेंबर) उत्साहात सुरुवात झाली. शालेय परिसर, शिक्षक, वर्ग मैत्रिणींना पाहून माजी विद्यार्थीनीच्या चेहऱ्यावर हास्य फुलले अन् नकळत डोळ्यांच्या कडाही पाणावल्या. गप्पागोष्टी, खेळातून शालेय आठवणी जागवत सार्‍याजणी रमून गेल्या. शाळेच्या प्रवेशद्वारावर आजी विद्यार्थीनींनी माजी विद्यार्थीनींचे गुलाब पुष्प देऊन स्वागत केले.
नूतन कन्या प्रशालेच्या १९७४ ते २०१५ या वर्षातील दहावीच्या बॅचच्या हैदराबाद, करिमनगर, मेहकर, पुणे, मुंबई, नागपूर, छत्रपती संभाजीनगर, नाशिक, वाशिम, यवतमाळ, नांदेड, जालना, बार्शीसह राज्यभरातून आलेल्या ७६२ विद्यार्थीनींची नोंदणी पहिल्या दिवशी झाली. दुपारी दोन वाजता प्रार्थना, राष्ट्रगीत झाल्यानंतर. आपण शिकत असलेल्या वर्गात जाऊन वर्ग मैत्रिणींसह गप्पागोष्टी करत जुन्या आठवणी ताज्या केल्या. संगीत खुर्ची, गोळाफेक, थालीफेक, शंभर मीटर धावणे, कबड्डी, तीन पाय दौड या खेळात आपले वय आणि पद विसरून उत्स्फूर्तपणे सहभागी होत खेळाचा आनंद घेतला. माजी विद्यार्थीनीच्या वावराने शालेय परिसरात एक चैतन्य निर्माण झाले होते.
या निमित्ताने १९७३ पासूनच्या विविध कार्यक्रम, उपक्रमांच्या छायाचित्रांच्या प्रदर्शनाचे तसेच स्व.सौ.दुर्गाताई कुलकर्णी स्मृती ग्रंथालयात भरविण्यात आलेल्या ग्रंथ प्रदर्शनाचे उद्घाटन महाराष्ट्र औद्योगिक विकास महामंडळाच्या विधी व कामकाज विभागाच्या महाव्यवस्थापक स्मिता बोरीकर (मुंबई) व मंत्रालय कक्ष अधिकारी रिना ठाकूर यांच्या हस्ते झाले. स्वागतासाठी नूतन विद्यालय शिक्षण संस्थेचे अध्यक्ष डॉ. एस. एम. लोया, सचिव प्राचार्य डॉ. विनायकराव कोठेकर, सहसचिव जयप्रकाश बिहाणी, कार्यकारिणी सदस्य नंदकिशोर बाहेती, प्राचार्य डॉ.शरद कुलकर्णी, दत्तराव पावडे, मुख्याध्यापिका निशा पाटील, उपमुख्याध्यापक परसराम कपाटे, पर्यवेक्षक दत्तात्रय घोगरे आदींसह आजी-माजी शिक्षक, कर्मचाऱ्यांची उपस्थिती होती.
