निवडणुकीच्या कामांमुळे शाळांना सुट्टी

मुख्याध्यापकांनी सुट्टीबाबत निर्णय घेण्याच्या प्रशासनाकडून सूचना

राज्यात काही ठिकाणी एकशिक्षकी आणि द्विशिक्षकी शाळा आहेत. त्याचप्रमाणे काही ठिकाणी निवडणुकीच्या कामामुळे शाळांमध्ये पुरेसे शिक्षक नाही. अशा ठिकाणी शैक्षणिक कामकाज चालणे अडचणीचे आहे. त्यामुळे या शाळांना सुट्टी देण्याबाबत मुख्याध्यापकांनी निर्णय घ्यावा. पुरेशा प्रमाणात शिक्षक असल्यास, तेथे शाळेचे कामकाज नियमित सुरू राहू शकते.- सूरज मांढरे, शिक्षण आयुक्त

प्रतिनिधी, पुणे : ‘विधानसभा निवडणुकीच्या कामकाजामुळे शाळांमध्ये पुरेशा प्रमाणात शिक्षक नसल्यास, अशा शाळांना १८ ते २० नोव्हेंबर या कालावधीत मुख्याध्यापकांनी आपल्या स्तरावरून सुट्टी जाहीर करता येईल,’ असे शिक्षण विभागाने सुचविले आहे. त्यामुळे राज्यातील प्रामुख्याने जिल्हा परिषदेच्या एकशिक्षकी किंवा द्विशिक्षकी, कमी शिक्षक असलेल्या स्थानिक स्वराज्य संस्थांसोबतच अनुदानित शाळांना सुट्टी जाहीर होण्याची शक्यता आहे.
राज्यात विधानसभा निवडणुकीसाठी येत्या २० नोव्हेंबरला मतदान आहे. निवडणुकीच्या कामासाठी शाळांच्या शिक्षक आणि शिक्षकेतर कर्मचाऱ्यांची नेमणूक करण्यात आली आहे. या शिक्षक आणि कर्मचाऱ्यांचे वेळोवेळी

निवडणुकीच्या कामाकाजाचे प्रशिक्षणही होत आहे. येत्या बुधवारी २० नोव्हेंबरला राज्यात मतदान होत आहे. मात्र, या मतदान प्रक्रियेसाठी शिक्षक आणि कर्मचाऱ्यांना १८ नोव्हेंबरपासूनच कामकाजात सक्रीय व्हावे लागणार आहे. या पार्श्वभूमीवर राज्यातील शाळांना १८ ते २० नोव्हेंबर या कालावधीत सुट्टी जाहीर करण्याबाबतचा प्रस्ताव शिक्षण आयुक्त सूरज मांढरे यांनी शालेय शिक्षण विभागाकडे पाठवला होता. त्यावर सुट्टी जाहीर करण्याचा निर्णय मुख्याध्यापकांनी आपल्या स्तरावरून जाहीर करावा, अशा सूचना विभागाचे सचिव तुषार महाजन यांनी केल्या आहेत. राज्यात विधानसभा निवडणूक सुरळीत पार पडण्यासाठी शिक्षकांच्या कामांमुळे शाळा भरवणे शक्य नसल्यास, त्या ठिकाणी संबंधित शाळेच्या मुख्याध्यापकांनी शाळा बंद ठेवण्याबाबतचा निर्णय मुख्याध्यापकांनी घ्यावा. याबाबतचे आवश्यक आदेश जाहीर करावेत, अशा सूचना महाजन यांनी मांढरे यांना दिल्या आहेत.

सलग सहा दिवस सुट्टी ?

राज्यातील शाळांना आज शुक्रवारी १५ नोव्हेंबरला गुरूनानक जयंतीनिमित्त सुट्टी आहे. त्यानंतर शनिवारी १६ नोव्हेंबरलाही अनेक शाळांना सुट्टी असून, दुसऱ्या दिवशी १७ नोव्हेंबरला रविवार आल्याने सुट्टी आहे. त्यानंतर १८ ते २० नोव्हेंबरलाही सुट्टी मिळण्याची शक्यता अधिक आहे. या पार्श्वभूमीवर राज्यातील काही शाळांना शुक्रवार ते बुधवार अशी सलग सहा दिवस सुट्टी मिळणार आहे.

CR_MaTa