क्रांतिज्योती सावित्रीबाई फुले यांच्या पुर्णाकृती पुतळ्याचे लोकार्पण

परभणी : येथील जिल्हा परिषदेसमोरील चौकात उभाण्यात आलेल्या आद्य शिक्षिका, क्रांतिज्योती सावित्रीबाई फुले यांच्या पुर्णाकृती पुतळ्याचे लोकार्पण इतर मागास बहुजन कल्याण, दुग्धविकास, अपारंपरिक ऊर्जा मंत्री अतुल सावे यांच्या हस्ते रविवारी, ९ मार्चरोजी करण्यात आले आहे. पालकमंत्री  मेघना साकोरे- बोर्डीकर यांच्या प्रमुख उपस्थितीत आणि माजी मंत्री तथा आमदार छगन भुजबळ यांच्या अध्यक्षतेखाली आयोजित कार्यक्रमाला आमदार डॉ.राहुल पाटील, आमदार रत्नाकर गुट्टे, आमदार राजेश विटेकर यांची प्रमुख उपस्थिती होती. या वेळी जिल्हाधिकारी रघुनाथ गावडे, मुख्य कार्यकारी अधिकारी नतिशा माथुर, मनपा आयुक्त धैर्यशील जाधव, माजी आमदार सुरेश वरपुडकर, बाबाजानी दुर्राणी, माजी महापौर प्रताप देशमुख यांच्यासह मान्यवर उपस्थित होेते.

७३ हजार मुलींना प्रशिक्षण : मंत्री अतुल सावे 

इतर मागास बहुजन कल्याण मंत्री अतुल सावे यांनी सर्वप्रथम कार्यक्रमाला उपस्थित महिलांना जागतिक महिला दिनाच्या शुभेच्छा दिल्या. आतापर्यंत महोज्योतीच्या माध्यमातून ७३ हजार मुलींना प्रशिक्षण देण्यात आले आहे. इतर मागास बहुजन कल्याण विभागाचा मंत्री म्हणून आम्ही राज्य शासनाच्या सर्व योजना यशस्वीपणे राबवित असल्याचे सांगत नागपूरसह प्रत्येक जिल्ह्यात मुला-मुलींसाठी वसतिगृह बांधत आहोत. मुलींना मोफत शिक्षण, १०० विद्यार्थ्यांना परदेशी शिक्षणासाठी शिष्यवृत्ती, बसचा मोफत प्रवास अशा विविध योजनांची माहिती मंत्री अतुल सावे यांनी यावेळी दिली. तसेच १ जानेवारी १८१८ रोजी फुले दाम्पत्याने भिडेवाड्यात मुलींची पहिली शाळा सुरू केली. लवकरच येथे फुले दाम्पत्यांचे स्मारक उभारण्यात येणार असून, प्रधानमंत्री नरेंद्र मोदी यांच्या हस्ते कामाचे भूमीपूजनही करण्यात आल्याचे मंत्री श्री. सावे म्हणाले. साताऱ्यातील नायगावात सावित्रीबाई फुले यांच्या नावाने २०० मुलींना राष्ट्रीय‌ संरक्षण अकादमीमध्ये नियुक्तीसाठी प्रशिक्षण देणार आहोत, असे सांगून त्याबाबतच्या कामासाठी नुकताच १० कोटीचा निधी उपलब्ध करून दिला आहे. राज्यात आतापर्यंत ७२ पैकी ५४ वसतिगृह सुरू केले असून, प्रवेश न मिळालेल्यांसाठी महाज्योतीच्या माध्यमातून मुलींना शिष्यवृत्ती सुरू केली असल्याचे मंत्री श्री. सावे यांनी सांगितले.

मुलींना स्वयंपूर्ण करण्यासाठी सरकार प्रयत्नरत : पालकमंत्री मेघना बोर्डीकर 

सावित्रीबाई फुले यांच्या पुर्णाकृती पुतळ्याच्या लोकार्पण सोहळ्याप्रसंगी बोलताना जिल्ह्यातील एकही मुलगी उच्च शिक्षणापासून वंचित राहणार नाही, यासाठी प्रयत्न करूयात. एक उच्चशिक्षित, संस्कारीत समाज म्हणून आपण सर्वजण एकत्रित काम करूयात, असे आवाहन पालकमंत्री मेघना साकोरे-बोर्डीकर यांनी उपस्थितांना केले. पुढे बोलताना आजचा क्षण हा आनंददायी असल्याचे सांगताना पालकमंत्री बोर्डीकर यांनी सावित्रीबाईंच्या पुर्णाकृती पुतळा लोकार्पण कार्यक्रमाला महिलांच्या लक्षणीय उपस्थितीकडे मान्यवरांचे लक्ष वेधले. पुढे त्या म्हणाल्या की, क्रांतिज्योती सावित्रीबाई यांनी समाजातील मुलींना शिक्षणाचा अधिकार मिळवून दिला. आताही महायुतीचे हे शासन मुलींना सामाजिक, शैक्षणिक आणि आर्थिकदृष्ट्या स्वयंपूर्ण करण्यासाठी प्रयत्नरत आहे. यावेळी पालकमंत्री मेघना बोर्डीकर यांनी प्रधानमंत्री नरेंद्र मोदी, मुख्यमंत्री देवेंद्र फडणवीस यांच्या नेतृत्वातील केंद्र व राज्य शासनातील महिलांसाठी सुरू असलेल्या विविध योजनांची माहिती दिली.

स्त्री-पुरुष समानतेचे फुले दाम्पत्याचे स्वप्न साकार : माजी मंत्री छगन भुजबळ 

कार्यक्रमाचे अध्यक्ष म्हणून माजी मंत्री तथा आमदार छगन भुजबळ यांनी महात्मा जोतिबा फुले यांच्या पुतळा अनावरणप्रसंगी यापूर्वीच परभणीला येऊन गेल्याचे सांगत, मंडल आयोगातील शिफारशींबाबत माहिती दिली. स्त्री -पुरुष समानता आणण्याचे फुले दाम्पत्याचे स्वप्न आज साकार होत आहे. पुरुषांच्या बरोबरीने स्रियांना काम करण्याची संधी उपलब्ध करून देण्याबाबत त्यांनी प्रयत्न केले. त्यामुळे आता महिला पुरुषांच्या बरोबरीने काम करत आहेत. आज मुलींना मुलांच्या बरोबरीने उच्च शिक्षण देण्याबाबत आमदार भुजबळ यांनी उपस्थितांना आवाहन केले. तसेच शेतकऱ्यांचा आसूड, गुलामगिरी वाचल्यानंतरच त्यांनी केलेल्या कामाची महती कळेल, असे सांगून सर्वांनी पुस्तके वाचण्याचे आवाहन आमदार श्री. भुजबळ यांनी केले.

माजी महापौर प्रताप देशमुख यांनी पुतळा उभारण्यामागील पार्श्वभूमी थोडक्यात विशद केली. प्रास्ताविक रोहित राऊत यांनी कार्यक्रमाचे प्रास्ताविक केले. सावित्रीबाई फुले यांच्या पुतळ्याचे शिल्पकार धनंजय वडगीरकर यांचे मान्यवरांच्या हस्ते सत्कार करण्यात आला. यावेळी सावित्रीबाई फुले विद्यालयाच्या विद्यार्थिनींच्या लेझीम पथकाने स्वागत केले.